Om oss
Ei satsing på Vik, Luster og Sogndal
Sognekraft og dei tre kommunane samlar kreftene i satsing mot grøn industri gjennom Sogn Utvikling.
Indre Sogn har kraftoverskot. Utbygging av det overliggjande nettet sender framtidas kraftproduksjon ut av regionen. I krafta ligg stort potensiale for verdiskaping og lokalsamfunnsutvikling.
Det ligg og stor samfunnsnytte i å få ned nettap og redusere investeringar i nett gjennom å nytte krafta der den vert produsert. Det er no eit tidsvindu for å få allokert og tildelt kraft til å utvikle dei nye grøne industriarbeidsplassane.
Viktige geografiske føresetnadar
Sogn har viktige geografiske føresetnadar, fjorden, riksvegar og flyplass for effektiv transport. Areal er tilgjengeleg både ved robuste punkt i kraftnettet og ved transporthubane. Lokalsamfunna er livskraftige og i vekst, lokalbefolkninga er godt utdanna og det er lange tradisjonar for industri og kraftproduksjon.
Sygnir har eit godt utvikla distribusjonsnett for kraft og vil vera ein viktig medspelar for få krafta fram. Sognenett sitt fibernett er moderne og gjev Sogn dekningsgrad og kapasitet i verdsklasse. Sognekraft er det største lokaleigde selskapet i regionen, med økonomisk kapasitet til å løfta større industrielle satsingar.
Regionen har høgskule, forskingssenter og 4 vidaregåande skular. Eit komplett verkemiddelapparat for næringsutvikling er samlokalisert på Campus i Sogndal, og er godt samordna og smidig.
Kommunane er aktive partnarar med næringslivet og er tydeleg forplikta gjennom avtalar til å arbeide kontinuerleg med å forankra selskapet sine satsingar i relevante fora og sikre at selskapet er tett på prosessar og interessentar lokalt.
Sogn tek på seg leiartrøya
Vik kommune
Når Sognekraft si utbygging av Feios Kraftverk er fullført, har Vik kommune innpå 1 TWh kraftproduksjon. Lange industritradisjonar og eit mangfaldig næringsliv pregar kommunen, der kommunen er aktiv tilretteleggjar for næringslivet.
Luster kommune
3.2 TWh vasskraftproduksjon legg godt til rette for utvikling av ny industri i Luster. Utviklingsorientert kommune, høgt kompetent arbeidskraft og nærleik til regionsenteret.
Sogndal kommune
Regionsenteret har nær 1 TWh fornybar produkjson, høgskule, forkningsinstitutt, stor tilflytting av høgt kompetent arbeidskraft og eit robust mangfaldig næringsliv.
Eigarar og styre
Sogn Utvikling er eigd 62,5 % av Sognekraft AS og 12,5 % av kvar av kommunane Vik, Luster og Sogndal. Styreleiar er Terje Bakke Nævdal (konsernsjef) og nestleiar er Berit Larsen (visekonsernsjef). Styremedlemmar er Arnt Solli (Senior Vice President and Head of Insight i Volue), Anne Karin Hamre (direktør Vestlandsforsking) og Jan Sølve Haugen (ingeniør Norconsult).